أم الخير
ياأم ضفاير ليل مجدولة
ياأم الخير ياأصيلة يابهية
ياغنوة حب بناي مغزولة
على شط النيل فى ساعة عصرية
حملناكي أتقلها حمولة
خدي من حملك حطي عليا
ديابة الغيط وجارتنا الغولة
مش عايزينك متهنية
إوعي يهمك دول ولا دولا
سيبيها على الله ثم عليا
إوعي فى يوم الاقيكي مذلولة
ولا حتى فى يوم الاقيكي محنية
وإن يوم جالك مهما يجيلك
إفردي ضهرك شدي فى حيلك
هنا ييجي دورنا نرد جميلك
نبقى نجوم بتنور ليلك
نبقى فى وسط التوهة دليلك
نحمي حماكي نموت فى سبيلك
بس أشوفك أملي عنيا
بصورة يامصر بتضحكي فيها
ولابسة الطرحة مع الجلابية
لايقة عليكي ولايقة عليها
بقلم طارق السيد
