"الزوجة الثانية"
جمعني وصديقي مناقشة حوارية،
قضية تخص الزوجة الثانية
صديقي متحفظ .. للفكرة رافض متحفز،
شعرت بالمرارة .. و نفسي بالسوء أمارة
كأني في الأساس ..عديم الإحساس،
خاين لأسرتي ولحياتي ناسف
عزمت على مناقشته ..أتعرف بفكرته ،
قضية الزوجة الثانية.. للخاصة والعامة
الحل ليها واجب ومعرفة رأى الحبايب،
ونسمع كلام صديقين ..فكرين مختلفين
نتكلم ببساطة ونبعد عن الرجعية،
ونناقش القضية بعيد عن السطحية
نتحاور بحرية بدون ديكتاتورية،
ونطلق لخيالنا العنان ..ونفكر باعتدال
قَطَب الجبين ..حمر عينيه
نظر لي باشمئزاز ..كأني من الجرذان
تغاضيت عن نظرته وغضبته،
ومناقشة فكرته وبدأت طرح قضيتي
يا صديقي..لو ولدك المحروس فشل في الدروس،
وضاع حلم كلية كلاس.. وراح معهد خاص
فاق وعرف خطأه .. وحب يصلح غَلطُه ،
نشجعه ونساعده.. ولا نقف ضده
يجرب تاني ويعيد.. ولانقفل له الطريق،
يصيبه يأس وبرود ..ويضيع أمله المعقود
ثار صديقي غضبان ..أنت صحيح جبار،
تخلط الأمور .. والجد والهزار
تناقش قضيتين في الأصل مختلفين،
إيه جاب زوجة تانية.. وطالب وكلية قمة
يا صديقي هى نفس القضية ،
بس شوفها بوجة و نظرة تانية
زوجتي بعد العشرة طلعت مش طموحي ،
قضيت حياتي أحاول تكييف أموري
ضاعت آمالي .. أحلامي.. وعقلي شت ،
والميه سابت بين كفوفي..واليأس دب
أستمر في حياتي وتضيع كل أحلامي ،
ومشاكل العالم تتراكم فوق دماغي
اخترت أعيش الدنيا وأكَمِل مع زوجة تانية ،
ألاقي نفسي وذاتي..واجدد عيشتي وحياتي
قال لي اسكت إياك تكمل.. كلامك مستفز..مدمر،
فين العشرة والمسئولية .. الرجولة والإنسانية
تبيع وتهدم بيت ..تضيع حياة ..تشرد اولاد ،
كل دا علشان طموح ..أوهام..أحلام شباب
أنت فاكر إيه الجواز.. تهد ركن .. تخرب أساس،
دا أنت حتى تبقى راجل ..البعيد ما فيش إحساس
يا صديقي إعقل كلامي .. بالمنطق رد اتهامي
عندك موظف مُهمل ..تَعِيس ،
فكر خامل.. مجهود ما فيش
، زملاءه منه شاكيين .. والبعد عنه منى العين
ومع النصح والإرشاد.. مستمر في العناد
ينكتب له تقرير ضعيف ..الاتهام يبقى لمين؟
موظف ما يساويش.. ولا غلطة رئيس
رد صاحبي بسرعة الكلام،
وقال لي تاني تضرب أمثال
دي وظيفة مش جوازة،
فرق شاسع في الحالتين
يا صديقي ..الجواز في الأساس ،
وظيفة بس يملاها إحساس
، مشاعر دافية وتربة خصبة
أمومة طاغية .. وأبوة صالحة
فيها حق مطلوب .. وجهد واجب من الزوجين،
وأي خروج عن المسار .. فشل يستحق الاعتذار
المسامحة أمر واجب بعد التماس الأعذار،
والمصيبة يا صديقي الاستمرار والتكرار
اللي أخطأ وما حاولش يصلح الأضرار،
ما يلومش إلا نفسه ..ما يستحقش الغفران
يا صديقي مشكلتنا .. دايما نداري خيبتنا،
وحِجة نربى الولاد .. وتكبر معاهم خلافاتنا
، نتغاضى عن إهمال مهيمن
وعقل متخلف مسيطر
وزوجة في البيت راكنة ،
ومشاعر وأحاسيس بايتة
تقول جوزي ملكته ..مع القايمة حفظته
ما تحاولش تصلح حالها ..أو تطور من حياتها
، تشارك الحياة ..أو تساند في الشدائد
تكبر مشاكلها وتصير نار قايدة
لما الزوج يتغير .. وزوجة تانية تظهر ،
الحياة حواليه تتكهرب..وينقلب حالها
، المدام تعمل مظلومة.. والحياة في عينها سودا
طيب فين الاهتمام.. والقلب والفكر من زمان
وقت الجد تعمل ضحية .. وتقول ظالم جبار
لم يصون العشرة..قاسي .. غدار
يا صديقي زوجة تانية.. طموح إنسان حَب الحياة،
حلق بأحلامه مع اللي شاركته هواه
، نصيحة لكل صبية خايفة من زوجة تانية
في أيدك حل القضية ..عقل وقلب كبير ومراعية
شمعة ووردة .. وحياة رومانسية،
ومشاركة للزوج ..عقلية ووجدانية
، كلمة حلوة في مغربية ..ونظرة كلها حنية
تكسبي قلبه.. ويوهب لك روحه هدية
*****
نصر سليمان محمد
