لو اقدر
()
لو اقدر اسرق من السما ترياق
واجيب حبايه من الجنه
واخلطهم باحساسي
عشان لو تمرضي حبه
اجيب نبضي بشرياني
واسقيكي الدوا مره
فيرجع لونك الخمري
ويرجع علي الخدود وردك
انا لو قلتي تعبانة
تموت روحي اللي ولهانة
واحس بدنيتي حلقة
ونفسي تبقي عطشانة
و ادور عند عطاري
علي وصفه لافكاري
والضم كل اسراري
في كاس مشتاق لانفاسك
ما انا انت وانت الذات
يا كل الحب والحكايات
ولما اسمع نغم صوتك
تنادي حبيبي احضني
الف الدنيا بجناحي
وقول انت اكيد مني
فاقوم من رقدتي واجري
علي دعوه ف صلاه فجري
فيجمعنا الندي علي الورد
واخاف منه فاداري الخد
بلمسه من شفايف عشق
فيسري الدم في عروقك
واتمايل علي عودك
واحط في شعرك الياسمين
وفستانك يفوق بساتين
فاغمض عيني واتشاهد
والمح من بعيد طيفك
خياله مالي تجويفك
وايده حاضنه في ايدك
فيهدي النبض في قلبي
وانفاسي تفوت جنبي
وتبعد عني وتعدي
وتسكن عيني علي نظرة
وانت في السما قمرة
وروحي تبقي طالعالك
فتمسكها السما مني
فاحاول اسرق الترياق
عشان مهرك يكون عمري
()
اسامه صبحي محمد
27/10/2015