"أصلى يا مان"
**********
جلوس قيام جلوس قيام
حيله تمام .
سك اقفالك . واقعد نام .
اوعاك تفهم اوعى تركز .
انت مواطن "اصلى" يا مان .
اعمل من بنها او من طنطا
غمض عينك عيش اوهام
اوعى تشاور يوم على حلمك
مش من حقك .تاخد نفسك
اقفل بؤك .. لمّاا نقولك .
لو هتلسن!؟ يومك أسود
ومساك الوان
انت مواطن "أصلى" يا مان .
**
ارفع ايدك . نزل رجلك
لملم جرحك واقتل فرحك
اركن مخك ف الحمام
و سع صدرك.واشفط بطنك
ضيع عمرك
واشكر ربك انك "اصلى"
عيش خدام ..
***
بقلمى
بهاء اللبودى
