في الذكرى العشرين لوفاة أمي
نفسي أجيلك . بقلم أحمد شاهين
ياللى شايلين ع الكتاف
أغلى حاجه فى دُنيتي
أمى يا رمز العفاف
أيه تسوى بعدك دُنيتي؟
الدموع شلال فى عيني
والفراق ساق خطوتي
نزلوها للحدها وخلاص
قفلوا عليها
فضلت واقف بعدها
نفسي أشوفها
وابوس إيديها
هي دي نفس الإيدين
إللي ياما جريت عليها
والملامح الجميلة
إللى كانت جامعة عيله
وإللي شايلانا فى عنيها
أمي
أمي مش قادر أروح
لسه واقف وف مكاني
كل شئ بعدك بيجرح
كل شئ بعدك أناني
الإخوة والصداقة
والمشاعر والمعاني
كل شئ بعدك غريب
والبرئ راح يبقى
جاني
أمي يا بركة حياتي
بعدك البركه خلاص
عشت بعدك ذكرياتي
والأمل قاللى خلاص
يوم رحيلك
يوم رحيلك هو يوم
موتي بجد
نفسي أجيلك
نفسي نبقى ويا بعض
#نفسي أجيلك
كلمات \ أحمد شاهين
10 \ 2 \ 2016
