لا تقطفي. .بقلم الشاعر. .صبحي ياسين

قصيدة:(وحشتيني)
…………………………………………………
وبعد غياب وحشتيني
بقلهالك وحشتيني
ودمعه تفر من عيني
وانا قاعد ومستني
لقاكي ليا يا وطني
وحشني ترابك الدهبي
وحشني النيل وحشني الليل
وحشني ارجع اقول مواويل
وحشني المشي عالكورنيش
واتنطط واغني واعيش
وأكل عيش
وأكل فول وطعميه ع عربيه
وأعيش في سلام أعيش مبسوط
مش عالرف أنا محطوط
أنا واحد كنت متغرب
عشان أكل أجيب لقمه
أجيب كسوه ولا هدمه
عشان وطني اللي بقيت بور
عشان ضهري بقى مكسور
مليش واسطه
ولا معايا كارت ولا كارنية
طاب أعمل ايه
شهادتي مرميه عالحيطه
لا ليها عازه ولا لازمه اهي زيطه
أنا اتبهدلت علشانك
أنا سفيت تراب أرضك
وانا اللي دافعت عن عرضك
وفي الاخر انا كرهتك والمحيره
مضيت بسبور وتأشيره
انا اتغربت علشان ابويا
علشان امي واخواتي
املهم فيا اني اجي
معايا فلوس كمان الأكل
وهدايا ومعايا حق وصل النور
انا اتغربت  علشانك
علشان مش لاقي فيكي العيش
عشان لو صبرت شويه
كان ممكن أشد حشيش
وانا قررت اروح ومجيش
لكن اعمل ايه وحشتيني
وأديني جيلك تاني
واملي ينصلح الحال
وبدعي ربي في صلاتي
يعدل البخت اللي مال
وبقلك يا وطني
يا نور عيني وحشتيني
………………………………………………………
بقلم الشاعر/ هشام الدكر