حلم حمار
من جوه قناة فى محطة
برنامج حطة يا بطة
هنقدم ليكم فكرة
مع لقطة فى حلم لبكرة
شوفت القطة فى بق الفار
والعصفورة فى عينها شرار
وشوفت النمر فى عز جنانه
فى عينه الرعب وديله فى سنانه
وشوفت غزال بيطارد فهد
وشوفت الفهد بيجري بجد
والتمساح فى البركة بيجري
من قرموط النيل الغجري
وشوفت الأرنب فارد صدره
ضد الذئب فى ليلة بدره
وشوفت قرود راكبين ع الفيل
رايحيين يصطادوا نسور أبابيل
والكتكوت إصطاد حداية
فرحان يبقول أهو جاني غدايا
وشوفت النملة قايمه بحملة
معاها جيوشها ضد وحوشها
وشوفت كمان إنسان الغاب
والنسانيس كاسرينله الناب
وشوفت حمار لابس كرافتة
مذيع برنامج حطة يابطة
بقلم طارق السيد