لا تقطفي. .بقلم الشاعر. .صبحي ياسين

بعدك انتي مفيش حياة

غوصي فيا واستبحي كل نقطة دم فيا
وامنعي من قلبي نبضة بس كوني ليا نبض
اجري فيا زي روحى
طيبي بايدك جروحي
واحضنيني جوه مني
خلي صوتك يملي ودني
يوانسني.. ويرشدني..
ويعطيني دوا لنفسي..
ويشفيني من الوسواس..
ويرقيني من الخناس..
ويملاني بأخلاقك..
يعلمني اكون حساس..
يتوبني عن الماضي..
ويملاني تقي واخلاص
استمري جوه مني
تحت جلدي واسكني
خرجي مني القساوة.. والخيانة.. والندالة
وازرعي فيا الحنان.. والأمانة ..والسلام..
والهداوة ..والسماحة ف الكلام

واقتلي ف لساني كدبه..
واعصري منه الحروف..
توبيه عن كل خوف..
وازرعي الصدق ف كفوفك..
تطرح التمر ف كلامي..

واوعي صوتك مرة يسكت
أو خيالك مرة يبعد
اصلي عايش محمي فيكي
من سنان الدنيا ديه
من خرابيش الزمن
من كلام كلاب بينهش
قلب حب ..
قلب طاب..
قلب تاب من كل ذنب
قلب ساب الدنيا لجلك
قلب نبتة فرعت ف أرض حبك
اوعي تمشي وتتركي بلدك وارضك
واوعي فيا تفرطي وتسلمي حكمك وعرشك

انا الدنيا اللي أركانها ..واسورها ..وسكانها..
وأطفالها عاشوا بحبك.

  بس عمرك.؟!!
هوه دا اللي فاجئة خاني ..
شد روحك خدها مني..

بس عدل ..انك تخدني مش تسبني..
بعد موتها افتكرها لوحدي وابكي..

الف عام عدوا عليه من امبارح..
ويدوب لسه الجرح طارح..
والكراسي
والحيطان
لسه شيلالك ملامح
حتى ريحتك لسه طايرة ف المطارح..

بس صوتك غاب يا غالية..
وانتي صورك كلها
كان ليها صوت
كان ليها ضحكة
كان ليها قلب..

ابكي ليكي ولا ليا
ولا مين فينا الضحية
انتي غبتي عن حياتي
وبعدك انتي مفيش حياة..

#محمود_الدندراوي