بسم الله الرحمن الرحيم
ليه يا بلدي
ليه يا بلدي
الصبح فيكِ مهره غالي
ليه يا بلدي
عشان آكل لقمة حلوة فيك ِ
أضحي بكل غالي
ليه يا بلدي
عشان ارفع راسي فيكِ
أضحي برجالي
ليه يا بلدي
عشان أزرع ورد فيكِ
أرويه بدم الشهيد
حالف ما ينبت فيكِ بالميه
ما يزهز إلا بنفوس حية
ليه يا بلدي
يموت فيكِ ميات من شبابك والغفير
عشان يشيلوا كام وزير
ليه يا بلدي
يدفع الفواتير فيكِ الفقير
تمن لقمه ونومة عل الحصير
وإن شكي ولا بكى
ما يلقى فيكِ إلا الجنازير
بخلت عليه يا بلدي
أكلتيه السم وحلى فيكِ بالخنازير
ليه يا بلدي
مكتوب علي همكْ
والوزير والغني هو اللي همك
وأنا مشيلاني غلبك وهمك
وهم ليهم عزمك وهمك .
دنا دمي مخلوط برملك
اسألي سينا واليهود
هيقولولك شعبك
هو العساكر والجنود
اسألي كل العالمين
هيقولولك شعبك عليك أمين
وإن ضعت ولا ضيعوك الناهبين
إحنا شطك ومرساك ِ
وعيونا حرساكِ
هتلاقينا واقفين مستنين بالورد والحنة
يا مصر يا جنة
خدنا منكِ الذل والقِلة
والغريب فرشت له رمشك ورد وحنة
ليه يا بلدي
الغني فيكِ يا خد ما يديكِ
وإن يوم أداكِ يأذيكِ
والفقير يواسيكِ يعزيكِ
وشعبكِ يديكِ ما يستنى
صابر عليكِ يتأنى
مهما تقولي محروم من الجنة
ليه يا بلدي
كفك بدمي يتحنى
والظالم فيكِ علي يتجنى
ليه يا بلدي
أديكِ كل حب
ألاقيكِ ندهاني في الكرب
تعباني في السلم والحرب
الوزير في الحرب يرسم ويتأمر
وإن نقص جاه يتذمر
وأنا يا بلدي
في الحرب فيكِ من قدام
وبعد الحرب اتغدى ما فطر وأقول كله تمام
ليه يا بلدي مكتوب علي
الذل فيكِ براكِ
بعيد عنك وجواكِ
ليه يا بلدي
عشان تسمعيني
همك الأول تلاتين سنة يرويني
أجيب منين عمر تاني
أعيشه وأحلم بالأماني
دفعت فيكِ كتير ومهرك علي غالي
ليه يا بلدي
عشان تطلع شمس النهار
أمشي جواكِ تلاتين سنة مشوار
أقف على بابك زنها ر
لا كلمة مسموعة مني ولا حوار
ليه يا بلدي
الصبح فيكِ مهرة غالي
مدفوع متقدم ومتأخر من فقيرك
متنازلة عنه بخطرك ولا مغصوبة لوزيرك
ليه يا بلدي
الصبح فيكِ مهرة غالي
مدفوع من شبابك مسجونين أيام وليالي
مدفوع من شبابك دم هاين عليكِ ولا غالي
ردي علي وقول لي
شرياني ولا بيعاني
شرياني أنا ولا حد تاني
ردي علي وقول لي
سادة ودانك عني ولا سمعاني
