.هههههههههه
على المصطبة
.
حياتى غم فى غم
والمدام فكرانى مهم
عشان بقيت زجال
.
قلتلها ياستى إتنيلى
لسه ياما هتتبهدلى
ماتبعليش ولا موال
.
والماهية زى ماهى
والفطار فول وطعمية
والغدا بلاش يتقال
.
أقول يمكن تصدق؟
عصيدة والعشا محدق
والانتحار بفكرى جال
.
وأشعارى منى بتنسرق
وقلبى عليها بينحرق
ومخى فيه زلزال
.
يسرقوها ومش زعلان
ولا بأفكر يكون لى ديوان
وكلامى ع الرفوف متشال
.
ومهما قلمى جاد
لا انا بيرم ولاحداد
ولا حصلت كلام الخال
.
قالت جرب تغنى
واسمعها نصيحة منى
يمكن يروق الحال
.
قلتلها مافيش موهبة
هو غنايا ع المصطبة
زى الغنا فى اوبرال
.
كفاية عليا غلبك
وخلينى قاعد جنبك
ولا عاوز دهب ولامال
.
وقاعدلك على البسطا
والعيشة هباب ياسطا
وازاى يروق البال
.
بقلمى
فارس بنى عبدالجواد
