نوسة
.
منين اجيب دهب منقوش
واللى معايا كام ملطوش
والعيشة بقت حوسة
.
وحبيبتى طلت من الشباك
وبتنادى انسا هواك
وضحكتها محبوسة
.
قلتلها باكر انا جيلك
وأغزل مواويلى واغنيلك
دا إنت يابت بسبوسة
.
ردت منين ياسطا
وإنت قاعدلى على البسطا
والجنيه فى سكة منحوسة
.
قلتلها نضربها عرفى
ردت آه منك ياقرفى
لازم ابقى عروسة
.
رجعت لابويا شقلى هدومه
ولعن سنسفيل يومه
وزنقنى فى اليك والدوسة
.
ناديت على امى
يمكن تشيل همى
ردت اجيبلك طبق كوسة
.
رجعت للنت وبأنتت
وقاعد وفكرى مشتت
وضاعت منى نوسة
.
ونست حبى وهوايا
وبعتت كل الهدايا
ومشت فى الحارة مهوسة
.
يخرب بيت الحب وسنينه
والفقر اللى عايشينه
والعيشة اللى معكوسة
.
ياعجبى
بقلمى
فارس بنى عبدالجواد