علمت نفسي
ياجرح زلزلني كسر قلبي وبكاني
منه سنين وسنين هفضل أعاني
غيرت إسمي وحتى كمان عنواني
ولسه الوجع ساكن فى وجداني
هربت من نفسي وروحي وكياني
وكل ما أهرب على طريقه ألقاني
وعلى فين أروح والجرح جواني
مفيش سكة ولاخطوة فرح فكراني
أرجع و أعيد المشوار من أوله تاني
أقول يمكن!! الاقي الدمعة سبقاني
مكتوب لي أعيش أسير لأحزاني
أهدى الفرح للغير وغير الجرح ماجاني
يادنيا عذابك عليا كتير مين منا الجاني
تعبت م المشاوير كان ايه اللي مشاني
وفيت ما لقيت غير قلة التقدير ملازماني
ياما بنيت ف حلمهم ولما أتهديت ماحد قواني
دفعت تمن فرحهم وراح عمري مجانى
نويت أفارق دربهم والعن اللي وداني
ولو حنيت والشوق غير ملامحي وسَهاني
ومن نفس كاسهم عاود عليا وسقاني
ورجعت منهم اتحير.... قولوا غلبني سجاني
شفت معاهم المُر ألوان ما كفاني
لكن خلاص علمت نفسي أنسى اللي ينساني
بقلمي /
أحمد محمد
