الأراجوز
غنوة أراجوز
مين المسؤل يا جبان متقول ؟؟؟
عن حال الناس جاوب ما تخاف
واقف مغلول علشان بنقول
فين الإنصاف
حبة مساخيط شبعو تنطيط
كدب وإسفاف
وإحنا الدراويش بقليله نعيش
وجيوبنا نضاف
دهب مشغول على أد الطول
وحرير ملفوف على إيد خطاف
واحد مقتول من برد مهول
مش لاقى لحاف
سعادة البيه تايه مسطول
لا عمره يخاف من الإسراف
ماشي مذهول مش معدول
من الكل يخاف أصله خواف
غيره معلول مجهول لوصاف
منقول في إسعاف
مريض مشلول مش لاقي محلول
جاله جفاف
واقف على الدور مستني دخول
بعد طواف
الباشا كسول ماسك كشكول
عامل صراف
شايل محمول دايما مشغول
مع أبلة عفاف
آدى الغلبان عامل إنسان
عايش فى زمان و سط
لصوص أصناف أصناف
أراجوز مهووس بنص لسان
طايش ملطوش دمه ممصوص
فى كل مكان طواف لفاف
مين المسؤل يا أراجوز ماتقول
عن جوع الشعب
يا خازوق مدقوق فى أفا الغلبان
ماتبطل لعب
هتنام عريان بين السكان
تصبح عيان هتشوف الرعب
هتمد البوز لما تعوز شئ
من الدكان ويقولك صعب
مين المسؤل يا أراجوز
ما تقول عن حال الناس
الناس مجانين رايحين جايين
على التموين ورغيف العيش
عايشين سنين ساكتين
قايمين قاعدين كما الحرفيش
مباقوش خايفين ولا راضيين
إلحق....... ياشاويش
ساب السارقين سجن المساكين
داخل خارج تلطيش
شاويشنا جبان شاف الملايين
نازل طالع تهبيش
تقول له فلان دا من الواصلين
يقولك كان ميلزمنيش
فين الدخان ويكون صنفين
لزوم التحبيش
ما خلاص خالصين كلنا مساجين
ساعة التفتيش
قدرنا نعيش تايهين ضايعين
فى سكة تهميش
حياة الناس مقسومه قسمين
واحد قشاش والتاني درويش
مين المسؤل يا اراجوز ما تقول
بقلمي/
أحمد محمد
