أبيض واسود
كنت بحب السيما زمان
أيام راحت فى خبر كان
كنت بشوف البنت الحلوه
شايله كتبها ورايحه الجامعه
شافها الواد الصايع أبو لمعه
قال لها ياجميل كفاية ملاوعه
قالت له عندك حاسب إوعه
أنا بنت عيله تربيه و سمعه
كنت بشوف
إبن الحاره الشهم الطيب
يخاف ع الجاره من الكل قريب
عمر العيبه ما طلعت منه
راجل قوى و سابق سِنُه
الكل كدا مبسوط ل نجاحه
ويشاركوه حزنه و أفراحه
كنت بشوف
الست أصيلة ب ملايه لف
رمش عينها يخطف يخطف
لكن ماشيه يا ناس ببساطه
وحده وحده كدا تاته تاته
الكل يشفها يقف يتصف
وسط الحته ياناس دلوعه
ماشيه بخفه وراس مرفوعه
أصل أبوها كلمته مسموعه
معلم تاجر ملو هدومه
كل الدنيا تعوم على عومه
شهم أصيل كدا من يومه
كل الحارة عملاله حساب
حاضر حتى و إن كان غاب
كنت بشوف
الباشا تلميذ رايح مدرسته
لابس طربوش مقوى عزيمته
خارج يهتف فى مظاهرات
مش هامه حتى لو كان مات
كنت بحب السيما زمان
قبل ما تبقى تجاره وإعلان
أبيض واسود بلا ألوان
أيام راحت ف خبر كان
بقلمي /
أحمد محمد
