-------------------------
هو هاني لما قال لي
روحي يلا عند ابوكي
ابقي احكي كل حاجه
واشتكي لامك واخوكي
روحت لامه كل حاجه
وسبت له البيت والعيال
الاهانه عنده عاده
لما منه صبري طال
بعد اسبوع لسه فاكر
انه قال يسال عليا
وانه قال وحشاه وصابر
بس قال يهدي شوية
كان فاكرني اني هارجع
لما ترجاني حبة
ناسي ان كلامه يوجع
لو حايلني بالمحبه
بس مين وحياه عيوني
اللي دبلت م الدموع
مهما حاولوا يرجعوني
ما ارجع الا بالخضوع
يجي ابوه واخواته قبله
يطلبوا منه اسامحه
هو يجي بعد منهم
وقتها افكر اصالحه
----------------------لما قال روحي لابوكي--------
بقلم
خالد الكردي