لا للإرهاب
ياأهل السكات ليه السكات لسانكو فين
دي الحياة تبدأ بصرخة ومنتهاها بشهقتين
إوعوا خوفكو يوم يشوفكوا يدوس عليكو
والشجاعة لو تخونكوا تمر بينكو وتخلى بيكو
يبقى ليه نخرس لسانا ياخلق ليه
ولو سكتنا طب سكاتنا يفيد بإيه
قولوا إللي ماقلتوه في حياتكو
قبل مايزهق منكو سكاتكو
قولوا بعزم الله ماإداكو
خايفين ليه دا على الله عشاكو
إصرخوا يلا وعلوا الصرخة
خلوا الصرخة في صدركو شارخة
تطلع منكو تهز الباطل
وإللي بيوعدكم ويماطل
يعرف إنكو قلتم لأ
ساعتها هتشرق شمس الحق
تنشر نورها تزيح الضلمة
وكل دا كله بسحر الكلمة
يارب ياعالم بالمجهول
قوي الناس تقدر وتقول
لأ ولأ وألفين لأ
للي ف يوم عننا ينشق
وزي التعبان يلدغ فينا
ويرجع تاني يدارى في الشق
الإرهاب إللي على الباب
إللي عايزها تملي خراب
مش راح يعجز إلا بحاجز
يحجزه عنا قضاءنا الناجز
كتفه ف كتف الجيش والشرطة
ساعتها وبس هيصبح عاجز
بقلم طارق السيد