زمن البرمجية
قالوا عليك كداب يازمان
قالو غدار ومالكش أمان
المستقوي بتبعد عنه
وبتيجي بس على الغلبان
يازمان البرمجية
والمأنتخ والهفية
والحويط والغويط
وإبن ستين مفترية
واللي ماشي في السليم
واللي حالته ياعيني جيم
واللي محروم م السعادة
تقتله ومالوهش دية
ياللي عمرك يوم ماكنت
بهلوان أو ألعوبان
بعلو صوتك مهما تصرخ
الزمان مالوش ودان
إشكي بس للإله
وانت ساجد في الصلاة
ينصرك على الزمان
تبتسملك الحياة
بقلم طارق السيد