صوت من الماضي
أنا درويش بياع طرابيش
إسألوا عني حسن بيه جاويش
طرابيشي أنا أباً عن جد
أكبس طربوشي ما يكبسه حد…
فين الطلبة فين سي لفندي
كانت طربوشهم دايما عندي
ياعمنا درويش الطرابيشي
ياأبو قلب أبيض منه مفيشي
إحنا في زمن الوسط الساقط
وحرب حواجب ويّا ملاقط
أما الشعر بموس إتجزّ
أو عرف الديك وكابوريا ورز
إسمحلي أقولك من نخاشيشي
إحنا في زمن اللاطرابيشي
وأنا سمكري أسطى وابور جاز
عدو الكهربا والبوتجاز
إكمامي أشمّر بوابير أعمّر
أصلح فونيا تبخ الجاز
ياعم السمكري روح شوف حالك
روح شوف شغلانة تانية أبقالك
إحنا في زمن اللابوابير
ربنا يصلح لك أجوالك
وأنا سقا وقربتي ملهاش زي
أملاها تسقي ف كل الحي
عمّال ألف أنا رايح جاي
وأنادي ياولادي ياأهل الحي
محدش عايز يملا القُلّة
أو إبريق أو حتى الدلّة
ياعم السقا يامنت حدُقّة
المية بتطلع لنا في الشقة
أصبر حبة نشوف أثيوبيا
يمكن نحتاج بكرة السقا
بقلم طارق السيد