شوية فرفشة
انا وبهانة فى البصل
.
بعد ماكنت فايز
وبأطلع الاول وأكسب جوايز
ضاعت القافية فى موالى
.
وبعد ماكنت بأنشر
وأقعد أحكى وأفشر
مش عارف ايه اللى جرالى
.
يمكن عشان البصل
ضربنا به المثل
وطالعلى فى العالى
.
ونفسى فى المحشى
وبهانة إزاى هتحشى
وسعر البصل غالى
.
قلتلها فين المسبك
قالت شبك إيديك شبك
اللى فاضلى كردالى
.
يعنى ابيعه عشان طبخة
والله اتانى لبخة
وماعرفت أنا مالى
.
وضاع الشعر منى
بعد ماكنت بأغنى
بكيت على حالى
.
وقاعد لوحدى أفكر
ودمى بيغلى ومتعكر
وسكتت فى الحلق اقوالى
.
وقاعد لامحشى ولادجاجة
قلت أكتب أى حاجة
وناديت على عيالى
.
أتانى حمادة ينتت
تايه ومخه مشتت
ووقف فى الصالة قبالى
.
قلت يابنى فين الورق
قال إلهى الشعر يتحرق
يعنى حتبقى ابوزيد الهلالى
.
يابابا دا أزمة ودايرة
فى القصابى والندايرة
وإسئل كمان خالى
.
فكيت علبة سجاير
وكتبت عليها وقلبى حاير
اللى على بالى
.
بكره يروق الزمن
وأشتريك يابصل بأرخص تمن
والدنيا تحلالى
.
وبصلى
بقلمى
فارس بنى عبدالجواد
