الحياة مسرحية ..!
محدش غيري جنبي
مع ان في ناس كتير
مش حاسس غير بنفسي
رغم الأنفاس كتير
كله بيقول يا نفسي
وبيظلم ناس كتيير
معدش حد عادل
بقى في أزمة ضمير
اللي شاف فلوس قصاده
قام يعبي مش مهم
مش مهم إيه قصاده
حرام ولا حلال
المهم يعبي جيبه
زي ما يكون احتلال
واللي شاف ناس تحت منه
داس عليهم بالنعال
الزمان اتقل خيره
والناس صبحت وحوش
واللي كنت فاكره طيب
لقيته بيغير وشوش
القليل كان ف إيدينا نعمة
أصبح للأسف مفيش
واللي كان عايش وراضي
بقى مش عارف يعيش
كله بيقول نفسي نفسي
كله عايش دور شيطان
واللي عايش دور ملاك
قافل علي نفسه الببان
بقينا عايشين مسرحية
بنمثل ليل نهار
اللي واخد دور بطولة
هو واحد قلبه مات
واللي الناس بيسقفولو
لسه خارج م الليمان
مش بنختار حتي دورنا
ولا السيناريو والحوار
والنهاية مش حتخرج
عن كونها جنة إما نار
بقلم : شريف بدوي
