حبيس الظلام
من بين أنياب الضلمة
وعذاب طول المشوار
كل مابنطق كلمة
يبكي لسان المزمار
وألقاني إتحشرج صوتي
وطعم الكلمة مرار
وكأني في ساعة موتي
خارج م الدار للنار
ياضلمة أسود من ليلي
قولي إمتى يجيني نهار
ياضلمة أنا مهدود حيلي
في بير مالوهش قرار
كان نفسي أشوف النور
كان حلمي أعدي السور
ياما إتمنيت المية
تروي في أرضي البور
ناب الضلمة نهشني
وكف الدنيا لطشني
وكل ماأفكر أهرب
قضبان الليل بتحوشني
ياشعاع النور ياواحشني
فكني من ليل كلبشني
زي أنا مابعيش في الضلمة
الضلمة كمان بتعيشني
بقلم طارق السيد
