رسائل لشخص مجهول
لكن المعلوم هو الرحيل
***************
لما بشوفك بحب كتير اسلم عليك
ولا لما تجيني من غير مناديك
ولما طيفي في بعدي يمر بأراضيك
اتعطر بعطر حنتك وتلاغيني عينيك
فاكر لما كنا نطير ف الهوا لما حواليك
...............
شوفتك مره شارد قُلت أصبح والاغيك
فكرك كان مشغول والحب مالي عينيك
حبيت أقرب قُلت أجرب أسلم عليك
فاجئه توهت في جنتك حاير مالائيك
لمحت شالك وصوت خلخالك مادد ايديك
.............
كنت ماشي أُدام بستان بيقولوا مدرستك
من بين الزهور حسيتك عرفت فصلك
ده كل الزهور نبتت ياحبيبي من اصلك
الفل والياسمين ليك تحيه ب يرقُصلك
...................
ف يوم العيد شوفت فجره ف جمالك
لابس جديد ماشي سعيد كايد عُزالك
عدى النهار شعرك ليل والقمر شالك
من حُسنك خايف عليك كل العيون بصالك
قلبي عليك جرى وبين الرموش شالك
وطنك هنا قلبي انا يا حبيبي هَنيالك
.............
وقت الرحيل خلاص و البابور وصل المحطه
بتودعني بحنانك وانا نفسي برمشك اتغطى
قلتلك بحبك سمعتني من خجلك جاتلك زُغطه
كل العيون متابعانا شايله فينا وكمان حطه
واحد خبط واللي وقعت طارت من إيديها البطه
.............
ارفع إيدك شاورلي مش كل الكلام بينا بالعيون
بلاش يَتعبني كسوفك هاقولك إغمز بالجفون
وعهد عليا في غربتنا ياروحي لعهدك إصون
أبعد بعيد وانت جوايا أرضي وسمايا ابد ماخون
افرح واطمن على حبك معايا ماتشغلكش الظنون
دانت دنيتي وحياتي انت الروح و القلب الحنون
#ايكادولي
حسن سعيد
