إن كان ولا بد تعيش مع ناس
يبقى اللى إنت فى قلبه أساس
أما الحب ان كان من طرفك
فإنسى و دوس قلبك بمداس
حبك هيكون نقطة ضعفك
ياخد منك ضعفين ضعفك
و يبدأ طعن بغل وصفعك
ويورث لك وجع الراس
إن كان ولا بد اختارك عاشق
يفضل عاشق مهما يكون
عمره ما يقدر يوم ويفارق
ولا يتعالى كما البالون
ويصدرلك كل مواجعه
ولازم يكسب كل مواقعه
وإن حبيت كده مرة تراجعه
يعمل قال الواد مجنون
إن كان ولابد بلاش تتورط
دي مافيش حاجه زي زمان
مانتش وش انك تتمرمط
وتشل بؤجة من الأحزان
تفضل بيها العمر جريح
قلبك يتحول لصفيح
والملاغيه غبا وتلقيح
سكاكين تنغز في الأبدان
إن كان ولابد وكان لازم
في ناس بتحب عشان تتحب
فإن كنت خلاص فعلا عازم
اختار لك حد بمليون قلب
يعرف يتسامح وشيل
ويكون جدر لفرع أصيل
مهما الدنيا عليكوا تميل
يفضل شايل و واقف صلب
#عادل_عوف
#إن_كان_ولابد
#مارس
