أنقذوا أطفال سوريا
@@@@@@@@
كام ضحيه وكام قتيل
وصرخه عاليه لشيخ عليل
وأمّ تصرخ ولادها ماتوا
وصوت ضناها علي بعد ميل
وفاكره إنه ف الردم صاحي
مستني يخرج ف يوم جميل
وأب يسأل عن أسره تاهت
وسط الجداول وسط النخيل
كام شهر عدي والاسره غايبه
ولحد أمتي مفيش دليل
وعروسه كانت ف الزفه قاعده
وف ثانيه واحده كان الرحيل
والبحر يخطف أزهار بريئه
معرفش ليهم ف الكون مثيل
يا بحر ارحم عيون حزينه
دموعها تجري ع الارض سيل
لو طفل جالك إياك تهينه
وف نن عينك لو يوم تشيل
وف كل حته تسمع حكايه
مع كل ثانيه صرخة عليل
يا سوريا شعبك ف الدم غارق
حكامك ألعن من إسرائيل
يا سوريا فين راحين معاكي
والقهر غالب من غير بديل
ملعون أبوها أم الكراسي
الدم أغلي لو يوم تميل
أو حتي لو ضرغام كبير
ياكل ولاده يحرق ف جيل
يعمل غدنفر علي ناس غلابه
ونعامه هاديه مع إسرئيل
تقتل وتنهب أهلك وناسك
وتقولي وطني ممكن يخيل
أنا مش مصدق رغم إني شايف
ف كل حته نسمع عويل
بعدين يا وطني أشكيك لمين
وانت اللي تايه ف الكون ذليل
تاخد قرارك من عقل غيرك
وقرار وجودك من إسرائيل
@@@@@@@@@
بقلم /////// طه إبراهيم
