لا تقطفي. .بقلم الشاعر. .صبحي ياسين

اتولي قلم ومسطره
أكتب الماضى ف سطور
أيام ماكنا ف مندره
ماكنشي لسه دخلها نور

نورنا كان لمبه فتيل
بقزازه مسحوبه لفوق
والنجم كان ساعه ودليل
نظبط عليه ساعة الشروق
ونقوم ونفرد المرايل
نحطها تحت المراتب
من يومنا وإحنا حالنا مايل
لافيه دخول ولارواتب
ونقوم ونمشى ع المدارس
بشطنه مصنوعه بخيش
من غير فلوس والمولى حارس
ممعناش غير كتب وعيش
وقلم رصاص بسنانى مبري
فاهمين كلامى ياأجيال جديده
كلامى عربى ماهوش بعبرى
العيشه كانت ع الحديده
أبلتنا كان إسمها سناء
تدخل تقول يلا قيام
الكل صاحى ومافيش غباء
الحصه دى حصة علام
الحصه كانت يومها جغرافيا
وأين تقع فى القاره مصر
تقعد تفهم ولو بعافيه
ونعصر عقولنا ميت مره عصر
دلوقتى جابوا نفوس رخيصه
شوية لصوص زى الذئاب
واحنا صبحنا ليهم فريسه
راح الضمير وف لحظه غاب
===================
الشاعر عيسى عبد الرؤوف