المشهد الثاني
ركبت وأتمشيت في عربيه عربيه أسأل مين نازل طنطا وربنا سهل ولقيت واحد نازل وقفت جنبه شويه سيبت معاه الجُرنال ودخلت الكافتريا أشرب حاجه طلبت قهوتي مانو حليب بن تقيل أيه ده شربت القهوه بسرعه لما لساني ألتهب أتخنقت من السجاير والدخان .
بسرعه رجعت جنب الكرسي حاسبي ياحاجه بعد إذنك يابني أتفضلي ياستي عبارات وكلمات منتشره داخل القطار #تذاكر يابهاوات و أشتركات والعسكريه كارنيهات معلش يابني أنا نازله دمنهور هاتي ياستي أنا مالي ده شغل وحق الدوله يابني إحنا بناخد حقنا منها لما تدور على حقها مننا يامه ماتروحيش بعيد بكلامك ده مش شغلي يابني مايبقاش أنت والزمن والمعيشه علينا أرحمني ربنا يرحمك برحمته يووووه عدي ياستي (حوار بين ست كبيره والكمسري)
تذكرتك يا أستاذ أتفضل وادي الكارنيه عسكريه.
أنت جيش يابني لا يا أمي كنت ودلوقتي معاش هو فين المعاش يابني أنا باخد 6500جنيه معاش جوزي كان جيش هو كمان حارب ورجع سينا وعياله مش لاقيه شغل رجع الأرض مش لعياله رجعها مصيف لليهود تاني .
معلش يامه كله هايتعدل وتحلو بلدنا بينا بمين يابني أنت شايف الوشوش إللي أدامك بص كده بص ماتكسفش هاتشوف العجب.
فعلا وشوش الناس بتقول كتير اللي نايم مسقط رقبته على كتف اللي جنبه شكله بيتخانق في حلمه هيعيط والا بيتصعب على حد مفتري عليه حتى في حلمه حزين دمعته ع الخدين شقيان ليل ونهار .
وست على ايديها عيل بتهننه ينام والواد جعان بزازته فاضيه اللبن مش لاقياه والصيدلي بيتاجر بضناها والدوله عاجزه وياه أبنها يصرخ وقلبها بيتقطع لو ينفع يرضع دمها بس يسكت من الجوع ولاحول ولا قوة إلا بالله.
وشاب واقف نايم لا مش نايم ده هايم بيلاغي بنت هناك شايفاه بيشاور بأرقام تليفونه وهيا تدلع وتسجل في دلال الارقام وفجأه تليفونه رن فرد وابتسم ولمحتها هيا كمان بتتبسم في التليفون ماتعف نفسك أنت وهيا وتتجوز منين ياخال بعد تعب الدراسه باليوميه شغال يوم أه وعشره على دا الحال لما البخت مال من غير مال.
وراجل ياعيني عليه ماسك جُرنال مارفعش عينه من عليه نظارته على نص مناخيره مركز أوي بيقرأ مال وأقتصاد مشاريع ع الورق وجنبها واحد سرق عمل قرض لمشروع كبير وطلع نصاب أكبر من المشروع بكتير لكن ياخساره عشم ناس بالشغل والخير الوفير فص ملح وداب جابوا أصله وفصله طلع أبن وزير والطياره كانت مستنياه مش لوحده لأ هو وأبوه الخطير.
وعسكري ومعاه مخلته واقف أسد كان قاعد قام لست زي والدته محترم ماهو من خيرة ولادنا وجنودنا لبسه محترم حالق شعره منعم دقنه على فين يافدائي ع الكتيبه أجازتي خلصت ومدتي هاسلم مخلتي وأشق طريقي بعد الجيش عايز أعمل مشروع صغير هاخد قرض على أدي أعمل ورشة مشغولات فضيه وأكمل نص ديني عروستي بتستناني.
وفي لحظه مر علينا مباحث القطار ضرب برجله طشت الجبنه بتاع الست الغلبانه حاسب يا عم مش عاجبك ياوليه هاتي بطاقتك سيباه في السكه كده ليه الغلط عندك قالتله ماهي المخله في السكه ماقربتش منها ليه أما وليه كبيره وخرفانه عايزاني أشوط مخلة جيشنا قالتله يابني منا ابني في جيشكم وجوزي كان بطل في جيشكم وهو جيشكم غير جيشنا شكلك إخوان ويومك مش معدي أنتِ هاتلمي نفسك ولا أسلمك في المحطه قالت لا يابني الله يسعدك الله يحرقك يامرسي أنت ومبارك .
جت المحطه و وصلنا طنطا نزلت الحاجه وأمنتني أمانه أكمل قراءة الوشوش.
ركبت ناس ونزلت ناس وناس نايمه ع الشبكه مقتوله تعب وهموم ساترها بس الهدوم تفتح عينيها تشوف على وشوشهم غيوم.
ركب من بين الناس شاب مربط مجبس متسند مالك يابني حالتك حاله حادثة عربيه لا عمليه من خاين بيجاهد فيا تخيل لما مسكوه يطلع بلدياتي لا والأنيل من كده أخو خطيبتي طفشان من أهله هربان من بيتهم كان بيقول رايح سوريا يجاهد ومنها على إسرائيل بس الظاهر بيجاهد فينا الأول يتعلم فينا وبعدين يروح هناك يشتغل طباخ ولا بيغسل أطباق إنما هنا يفجر يدمر يكفر يحرق يخون وأنا وأهلي وأخته ندفع تمن جهاده بغبائه .
الحمدلله لقيت كرسي وقعدت أخد نفسي تعبت من الوقفه.
#تذاكر ياحضرات