المشهد الرابع
من رحله في وشوش مصريه
واحد شاب شكله مشاكل بيفوق من تواهانه على صوت الكمسري بيكلم واحد شكله مبرشم ومشاكله معلمه على وشه عاهات مستديمه شويه وكان هايضرب الكمسري والناس كالعاده السلبيه والبعد والخوف من توابع المشكله منعهم يتدخلوا فيها واحنا مالنا شعار الكل خلينا في حالنا.
نزل الشاب من على شبكة الشنط ومسك الواد الصايع لطشله وكان هايحدفه من القطار لكن الكمسري اترجاه وسابه يقعد على الارض ادام باب العربيه .
ولاقيته بيكلمني هات سيجاره قلتله مابدخنش قالي يابختك استغلتها كلمه وفتحت معاه كلام ليه وانت ليه ماتبطلهاش ضحكه حزينه مالهاش طعم صدرت منه.
قالي عارف انا كنت وحيد اهلي دلع وبغدده وكل حاجه متوفره سافرت وسيبتهم اشتغلت واعتمدت على نفسي كونت نفسي ورجعت اتجوز عملت مصلحه على اد فلوسي كشك في حارتنا صغير قلت اعيش جنب امي وابويا واعمل بيت واهل الحته فرحولي وفي يوم كل الحلم اتهد الازاله واشغال الطريق جاين يهدوا عماره مش مرخصه المقاول ظبطهم و لكن في السكه خدوني هدوا الكشك واتعملي قضيه حبس 3سنين ومن ساعتها وانا هربان هنا القطر بيتي والكمسريه اهلي والكلب ده كان بيتخانق مع واحد من اهلي ده غريب مش من قطرنا.
زي كده لما نشتم في البلد والحكومه احنا ولادها وهما مننا لكن لو كلب شتمهم من بره البلد مانستحملش. سلام
وخد بعضه وقام بعد ما اداني درس في الوطنيه
حسن سعيد ابراهيم
#أيكادولي