( البنت عروسه بتتوضا )
_______________
مش هاكتب أحلام ورديه
وبلادي تموت من غير ديه
أنا بلدي قويه وعفيه
بلد امي وابويا وعمي
وترابها المعجون من دمي
تلاعبني ويمكن تلاوعني
وتزعل لو شيئ يوجعني
انا شعبي وهاكتب عن همي
وهاعبر عن ناسي وأهلي
بصراحة والراحة ضمير
مش هافتح ودني
للقال والقيل
أنا هافتح عيني وهاشوف
وهاصور ع المكشوف
أصل الفايدة ف التصوير
مش هاوصف أي فقير
ولاهاشتم حتى وزير
أنا هاكتب عن شعب
كل الشعب محتاج لضمير
محتاج للنخوه لاجل يغير
ويطير ع المصنع
ومكن واقف نفسه يدور
علشان يصنع
والعجلة تدور
وندور ف رحاب الساقيه
نزرع نقلع
نروي الأرض
والبنت عروسه بتتوضا
فاردا الأحلام بالطول والعرض
مدا إيديها وتتمنى
بخضار الأرض وتتحنى
لاجل خدودها ماتنطق عفه
وتطرح شهد
ويجي عريسها ويطلب إيدها
والأم تزغرد م الفرحه
وترش الملح وتحميها
من عين حسادها
وتغزل توبها خيوط من ورد
لاجل ماتصنع بإيديها الطارحه
وآدان ع المدنة بينده خير
بينادي ف خلق الله والطير
لاجل نصلي الفجر ونسعى
ورزق الفجر ف علمه وفير
نصبر على بعض ونهدى
ونقرب من بعض كتير
بالحب ونرجع إيد واحده
نتحدى النوه ف بحر خطير
ليه نبعد وتزيد أوجاعنا
ليه نقسى ومن غير تفكير
وخلافنا يغرق مراكبنا
وانا وانت بيجمعنا مصير
ومصيرنا رباط وبيجمعنا
أنا وانت وليوم الدين ..
ومصيرنا رباط وبيجمعنا
أنا وانت وليوم الدين ..
________________
بقلمي .......
معوض حلمي
منشأة بطاش
تمي الأمديد
دقهلية