شارع الغورية
ياشارع الغورية
ياشارع الأصالة
يانبع نور ومية
يامصنع الرجالة
ياشارع الغورية
كلك دهاليز ومسالك
ياشارع مية مية
بتلاتين تلاف زمالك
ياشارع الغورية
ياشاهد ع الزمان
وآثاره الإسلامية
منقوشة على الجدران
فيك الدنيا صاحية
وناس من كل ناحية
جاية ولا رايحة
كله هناك هيبان
هاخدكم وأطلع رحلة
في شارع الغورية
والرحلة معايا تحلى
بالذات في الحتة ديا
قرب قرب قرب
قايس مرة وجرب
عندي التمر الهندي
بالورد بيتشرب
إديني كوباية ياعمي
خليها تروق دمي
إشرب بالهنا ياحبيبي
وقبل ماتشرب سمي
إستني ياحاجة شوية
أنا هنا أحسن خضرية
خدي مني كرنباية
على حزمة ملوخية
أسلقي وياها فرخاية
والثوم لجل التقلية
خدي مني ياحاجة بسلة
كيلو واحد يملا الحلة
أطبخي غدي العيلة
وإعزمي كل الشلة
بكرة هجيلك والله
ياحاجة الرزق على الله
عندي ستان وحرير
وعندي كمان كشمير
وصوف م النوع الفاخر
أشكال وألوانها كتير
عايزة قماش ع الموضة
أعمله بناطيل برمودا
حالا من عيني ياشابة
يادي الموضة السودا
جبت قماش بني وسكري
ولا تحتاري ولا تفكري
حتكوني أول واحدة بتلبس
البرمودا صوف العسكري
أنا عمكو جاد شغلتي حلواني
بسبوسة وكنافة جلاش ورواني
انا كومبارس بدور بواب
حتى لايطير يوم دخاني
بجنيه بسبوسة ياعمو
وعليها حتة قشطة
بالسمن البلدي ياعمو
عشان جوز أختي أنشطة
وأجيب بالباقي جلاش
أو خدي دكاني بلاش
خلي الباقي المرة الجاية
لما أجيلك أخد ببلاش
هريدي حانوتي وتاجر موت
رزقي بيجي لو حد يموت
كل الأصوات من حواليا
ندب ونبر بعلو الصوت
بكرة ياحاجة تشيلك إيدي
إن شاء الله تموت قبلي ياهريدي
راجل سو علينا هوهو
هز في ديله وعض في إيدي
وأنا عم علي الطرابيشي
أنظف من جيبي مفيشي
عشان مابيشتري مني
إلا اللي عايش دراويشي
قوللي ياعم الطرابيشي قوللي
ممكن طربوش بمبي ب توللي
مطرز ع الجنبين بالترتر
ياحليلة ياحليلة ياحليلة ياحلوللي
أقول طرابيش وتقوللي بتوللي
روحي يابنتي الله لايسيئك
يكفيكي ربنا شر طريقك
طايقة إزاي نفسك ياصبية
في دقيقيتين مش قادر أطيقك
عايز أروح درب الجماميز
إلهي ماتنضام يوم في عزيز
عيني ياحاج أنا هوصفهولك
ركز قوي في اللي هقولهولك
خش في مسلك زاحم تسلك
تطلع منه تلاقي دهليز
في الدهليز هتلاقي دحديرة
في الدحديرة درب الجماميز
متشكر قوي ع الوصفادي
يبقى هخش من الناحيادي
وأسأل أخش في أيها مسلك
ولا أختار بيتهم حادي بادي
مساء الفل
مساك عسلية
قوللي ياحلو
أأمر ياعينيا
عايز أروح حي الباطنية
تمشي كدا على طول على طول
تلاقي هناك مستوقد فول
جنب المستوقد وسعاية
على بابها واحد مسطول
تلاغيه يلاغيك ياجميل بالسيم
يسأل كلمة سرك إيه
قوله المدعو غريب وغشيم
هيقول خش إقلع خد دش
خش ياعم وخد لك دش
خد لك دش بكامل لبسك
تلقى الجن الأحمر حبسك
جوة مغارة في قلب الحارة
في ساعة طيش تلاقية كدا لبسك
ومتنساش بعد الحمّاية
ترجع هنا تحكيلنا حكاية
عن كتكوت سفروت وغشيم
صدق يوم وصفة حداية
جرى إيه ياحليوة بقى انت وهو
ياللي ماعندكو أي مروة
شوف حلاق يحلق لك شعرك
قول للبوكسر خش لجوة
وانت ياحلو ياأذكى إخواتك
وفر يابتي عليك وصفاتك
ياللي لسانك ماعتق حد
وعايز جوز إقلام ع الخد
نصيحة مني ياحلو عشانك
إعقل حبة ولم لسانك
هو اللي هيرميك في النار
حط كلامي حلق في ودانك
ياصاحب السعادة
ياواد سكر ذيادة
ياساكن حينا
هدي شوية في خطاويك
بشكيلك منك ليك
بتدوس على قلبنا
يوماتي ياخدني الشوق
وأبص ياروحي لفوق
بنظرة متدارية
تاخدني أوام لبعيد
لبعيد قوي قوي لبعيد
بعد ماتسحرلي عينيا
وداري ع الشمعة تقيد
أبوكي ياروحي شديد
هيجيب ويحط عليا
ماشاء الله طويل وعريض
والصحة ياروحي حديد
أخاف ل يبهدل فيا
خش ياواد م الباب
خلينا نعيش أحباب
ولا حد يفرقنا
دايبة ياواد في هواك
مطرح ماتروح وياك
غربنا أو شرقنا
ياللي بتلعب كورة هناك
ياللي كسرتلنا الشباك
إياك تلعب هنا تاني مرة
وإلا أنا هنزل أقول لبباك
معلش ياحاج دي بس الشوطة
مكتوب لها تكسر شباك
خش وكمل عصر الأوطة
ست الحاجة بتستناك
ياواد يامنيل الليل ليل
إطلع ولا هتطلع عيل
خلاص ياأمي خلاص أنا طالع
صوتك جايب أخر الشارع
أبوس في إديكي بلاش يامنيل
بدال ماتنادي أعمل مش سامع
طب وريني هوريك شغلك
أمدك بالخرزانة على رجلك
أدي شارعنا وأدي حواريتا
ودي حكاوينا اللي بتحكينا
يرحم نجم وشيخنا إمام
عاشوا معانا ولينا وفينا
بس خلاص دي نهاية الرحلة
مش قولتلكو الرحلة بتحلى
لأني وليد أنا هذا الشارع
إللي العيشة فيه أحلى وأحلى
بقلم طارق السيد
