حتة بلياتشو
من عنبر ستة وستين
قسم بولاق فرع البساتين
هنقدم ليكو إسكتش يجنن
بطولة سماعيل أفندي يس
يرفع الستار الأن
على بلياتشو قوي وغلبان
عيشته في عشة عشاه عيش حاف
وساعات دقة إن كان كسبان
عيبه إنه مالوش في الحركات
ولا هو بيضرب شقلباظات
ولا يشعبط في الترابيز
ولا يتبروز في البراويز
زي زمايله البهلوانات
شغلته بس يضحك فينا
ويفرفشنا ويسلينا
ويمسح دمعة في طرف عنيه
ياإما بكمه ياضهر إديه
يضحكلنا علشان يرضينا
وبعد الشغل يعود للعشة
يدعك بإديه عضامه الهشة
بس نصيحة يابهلوانات
يكسر ضهر الجمل القشة
هو صحيح حتة بلياتشو
بس إحذروا من عضو وهبشو
لما هيطفح بيه الكيل
يقلب ديب وهتقلبوا كبشه
بقلم طارق السيد