لا تقطفي. .بقلم الشاعر. .صبحي ياسين

خلاص هتجن
ياشباب غاوي المهرجانات
رقصكو رقص البهلوانات
أنتم منا ولا علينا
ولا ولاد ستين خواجات
نهقوا رفسوا فلفصوا قرفصوا
يمكن هتبيضوا ولا هتفقسوا
ونيجي نسألكوا بتعملوا إيه
تردوا تقولوا قال إيه بترقصوا
ياشباب فاكس ياشباب تيت
ياشباب أشبه بالعفاريت
شعر محفلط جل مزفلط
والبوكسر طفشان م البيت
ولا كمان الداهية السودا
بناطيلكو الماشية على الموضة
إللي مقطع واللي مرقع
واللي مهربد والبرمودا
نفسي أعرف مين إللي أويكو
فين أهاليكو ولا ماليكو
ياللي عاجبكوا المدفعجية
وأوكا وشحته وغاندي وريكو
قربت خلاص ياشباب أتجن
من دبابيركو النازلين زن
فين قتديل ومحمد رشدي
فينك روحت يازمن الفن
فين الموال والأغنية
فين عرباوي وفين عدوية
وفين ياخوانا 3 سلامات
فين العزبي وفين يابهية
ياأهل المغنى كفاية أغاني
أبوس في دماغكو دماغي وجعاني
بطلوا مغنى الله يهديكوا
إعملوا بقا معروف في وداني
بقلم طارق السيد