اكتبي كل اللي بينا
فوق جدار الذكريات
وواعي تنسي يوم ماهُنا
ع اللي حُبه ف قلبي مات
وابدأي من يوم لقانا
ع الرصيف
وانتي قاعده تحت تنده
زى شجره ف الخريف
والدموع اللي ف عيونك
م اللي فكر ..يوم يخونك
صوتها كان ..بيقول آهات
وواعي تنسي صوت دموع
قلب محشور ف الضلوع
كان بيشكي من حبيبه
لما فكر ........يوم يسيبه
واستباح........ قلب البنات
اكتبي فوق الجدار
طعم كاسك م المرار
لما طار الحلم منك
غصب عنك من سكات
وابتدت منك تقرب
رحلة الخوف والشتات
اكتبي مين مد ايده
للإيدين المرعوشين
واكتبي مين كان وريده
قلب مليان بالحنين
وواعي تنسي مين عشانك
غمي عينه عن حاجات
اكتبي كل اللي فات
فوق جدار الذكريات
عن حكاية عشق ماتت
كان أملها تعيش ساعات
واوعي تنسي ترسميني
لعبه ف ايدين البنات
وارسمى قلبي اللي حبك
بين ايديكي ..نبض مات
**********************
رضا ابو الغيط