قصيده بعنوان...... عيد ميلاد
قالوا عيد ميلادك ياحبيبنا
أحلى وأجمل عيد
والفرحه جايه علشانك
ولابسه لبس جديد
أنا قولت أهلا مستنى
وبيكوا هبقى سعيد
واللى يجيب دبدوب
ده يبقى واد حبوب
واللى يجيب لى قميص
بكره أشوفه عريس
واللى تجيب لى ورده
دى تبقى تايهه وشارده
وإوعاكوا تنسوا التورته
لحسن دى تبقى ورطه
وتلخبطوا التقليد
وف وسط التورته حطوا
أكبر شمعتين
الأوله فيها حبى
ومعاها الدمعتين
والتانيه فيها ملامحى
وعذابى ويا جرحى
مع صوره وضحكتين
وإوعاكوا تطفوا شمعى
خلوه بينزف همى
والحزن اللى ف قلبى
والشوق ويا الحنين
وف أخر الحفله شوفوا
إنسان ساءت ظروفه
إتغيرت حياته
وإتبعترت حروفه
عشمان يعيش سعيد
ويبدأ من جديد
ك أى طفل وليد
ساعتها يبقى العيد
أحلى وأجمل عيد
كلمات الشاعر محمد ثروت عبدالحفيظ