لا تقطفي. .بقلم الشاعر. .صبحي ياسين

برااااااها الدنيا بتوريك
منو المستني فيك عتره
ومنو الراكز يشد حيلك!! 
منو القلبك سكن قلبو
ويعدل ليك دوام ميلك
منو البضحك وقت تبكي
منو العايش معاك ويلك
منو البسهر عليك شفقان
إذا اظلم عليك ليلك
منو المكسور دوام خاطرو
وشايل دون كلل شيلك
🔸🔸🔸
براها الدنيا بتداويك
إذا زادت عليك اوجاع
ترجع ليك تاني حبيب
حسبتو مع المواجع ضاع
تقلب في الزمن والناس
يبين ليك البشر انواع
ويبقى المستتر واضح
وتكشف ليك الف قناع
منو الشاريك بي عمرو
ومنو الخائن هواك وباع
🔸🔸🔸
دمعه بتسقي احلى شتول
ونحصد منها الأفراح
كتير القلنا ما برحل
وبكره مع المقادير راح
يصعب تحكي عن باكر
إذا خيط الفجر ما لاح
محال توصف دواخل زول
إذا مكتول بي الف سلاح
وبرضو مع الحبيب يفرح
وفي اعماقو نازفه جراح
🔸🔸🔸
غريبه ولابتجد تفسير
ولا بتقدر تخت قانون
كم من ضاع هدر عمرو
و كم باع التشوفو حنون
غريب البي الفرح طاير
ومربوط في القلب مسجون
معاني مع الشرح بتغيب
ولا أظن تفضح المضمون
و عقلك لو عقل ينقص
جنونك زيدو تاني جنون
🔸🔸🔸
دمعه تلم قلوب أحباب
ودمعه تودع الإنسان
ناس تديها ما تديك
وناس تهديك بالمجان
وإخوان من بعض أغراب
وفيها أخوان.. ولا أخوان
مشاكل يوم تزيد تتحل
وفرحه بتتقلب احزان
هموم الدنيا ما بتكمل
كمال الدنيا في النقصان..