" ابو مرزوق طافش !!"
🌇( للترويح عن النفس )
****************
__هه ! خير يا طير ، فين العزم يا ابو مرزوق حامل بقجتك على كتفك وطالع فيها ركض ، ما تقولش حدا لاحقك بعصا؟!..
__لا والله يا ابو العبد ، بس بدّي الحق الباص اللي رائح على هاي البلد اللي بيقولولها أمريكا يا خيا ابو العبد !...
__على أمريكا يا ابو مرزوق ؟ مرة واحده ! وبالباص كمان !! انت عّم تحكي جد يا ابو مرزوق والا عّم تمزح ؟؟....
__شايفني عّم بمزح يا ابو العبد ؟ مش شايف عرقي مرقي عّم بيشر على جبيني بدّي الحق الباص ؟؟!! ...
__خيا ابو مرزوق روِّق ، اولا على أمريكا بسافرو بالطيارة مش بالباص ، وعلشان تسافر على أمريكا لازم شغلات كثيرة تحضّرها اول ، وهاي، ببقى أفهمك عليها بعدين ، بس قوللي بالاول عند مين رائح وشو إلك بامريكا شغلت بالي يا خيا ابو مرزوق يا طيب ؟ ، وبعدين مش احنا بخلقة بعض كل يوم ، ليش ما قلتليش انك حابب تسافر على أمريكا ؟كان اخذنا وأعطينا بالحكي مع بعض ، وفهمتني نواياك مش هيك طب غم. تحمل بقجتك لا شور ولا دستور وعلى أمريكا ؟؟!!..
__ انا يا خيا ابو العبد رائح على هاي العمارة العالي اللي صافّين على دايرها كل أعلام العالم بامريكا ، بدّي اروح أقابل هذا المخلوق اللي اسمه " ابو كمون " اللي بيقولو انه مسؤول هناك مع انه لا بكش ولا بنش طول الوقت طابب على طاولته ونايم بيشخّر !!؟..
__اولا يا ابو مرزوق هذا المخلوق اسمه " بان كيمون " مش " ابو كمون " وهو الأمين العام للأمم المتحدة اللي هي هاي البناية العالي اللي علام العالم كله مصفوفين على دايرها ، وبعدين شو إلك مع " بان كيمون " هه هه ؟!...
__والله يا خيا ابو العبد هذا الزلمة فلقني وفقع مرارتي لانه مذبذب مقلّب مغلّب بيلعب عالحبلين، اللي مسؤول وبيقولوا عليه أمين عام لازم يكون أمين على مصير العالم ويكون عادل ما يؤخذ طرف واحد على حساب الطرف الثاني مثل ابو كمون آسف هذا البن كيمون اللي بنام الليل كله ولما بيصحى مثل البغبغا بعيد كل كلمة بيقولها هذا اللي اسمه ابو حسين اوباما ضدالفلسطينيين ومع اسرائيل ، انه الها حق تدافع عن نفسها وبيرجع بيغط بالنوم ، اي هي اسرائيل اللي ناهبي ارضنا وعامله عمايلها مع شعبنا قتل أطفال ونسوان واعتقالات واغتيالات ووو الخ الخ هي اللي الها حق تدافع عن. نفسها ، وشعبناالمقهور والمظلوم على أمره "هيك وهيك لامه ؟؟!! " بدّي اروح وأخبط لوه بالصرماي على طاولته اصحّيه من نومته اللي هي زي نومة أهل الكهف بلكي بيصحصح ويفهم إنّه العالم مش هيلمه ومش كل شي بيقولو اوباما مقدس ولازم يعيده ورآه مثل البغبغة ، شو بتقول يا ابو العبد معي حق والا لأ؟..
__معك ستين حق يا ابو مرزوق ، بس لا بن كيمون ولا اوباما ابو حسين ولا اي رئيس أمريكي بيقدروا يغيروا شي لأنهم كلهم مثل شراشيح السليقة لا بكشوا ولا بينشوا ، لأنهم كلهم مجرد ألعاب بايدين الشركات ورؤوس الأموال الضخمة وما تنسى اللوبي الصهيوني ايباك الي بيأتمر بأوامر اسرائيل وحكوماتها المتعاقبة وبدوره آلو دور كبير في سياسة أمريكا ....
__ انت وسع لي طريق يا ابو العبد وانا بدّي اعمل عمايل بامريكا مع ابو حسين اوباما ومع بان كيمون ومع ايباك وراح أغوص والوص مع كل هالشركات وأَلْعَن وما اخلّي ، انت بس فلّتني عليهن وفهّمني اي اسهل علي اسافر بالباص والا بالطيارة !!!!؟؟؟؟؟؟؟؟.
🌇
🌇🌇جان زهر 🌇 ٩/ ١ /٢.١٦