طه حسين
أنا طه حسين أنا طه حسين
أخدت شهادتي من السربون
أتبسم وأرطن سي تري جولي
وأقول كمان سي تري تري بون
بعد ما كانت أكلتي مش
وعيش بتاو وخيار وزتون
وأمي تقولي يا طه معلش
بكرة هيرضيك رب الكون
بقيت أتغدى فيميه وكافيار
أتعشى بيكاتا بشامبينيون
وبدل العسل الإسود أحلي
بالشيكولاته وبالبومبون
بس مابين مشي وبمبوني
وبين كتّابي وبين سربوني
رحلة طويلة مع الأيام
تبدأ بقراق ضي عيوني
ومن كتّابي لحد الأزهر
بعد الأزهر روحت الجامعة
وكنت الأشطر بين زملائي
وقت ماكانت الجامعة بلمعة
ودارت الأيام بيا
من بعد طاقية وجلابية
لبست البدله وطربوشها
وطلعت البعثة المصرية
روحت فرنسا مدينة النور
فيها الظاهر والمستور
فيها العلم بيملا زكايب
فيها السرداب المسحور
واللي يخشه لابد يلف
أو يتكعبل في اللي ما لف
يقع ويقوم ويعود من تاني
يلف اللفة في كل ملف
خشيت جوه لقيت متاهات
لفيت فيها سبع لفات
ورجعت لأمنا مصر حبيبتي
حاصل على أعلى الشهادات
بعد زماني مالف ودار بي
حدفني لقفني بعد ماطار بي
إسمي الرسمي طه حسين
لقبي عميد الأدب العربي
ياللي هربتم مني لجاهل
أو فنانة بتستعبطكو
أو لعيب كورة مش مساهل
بكرة تخبطوا تحت بطاطكو
بقلم طارق السيد
