" ابو العبد حل المشكلة !!؟" 
🌇جان زهر 🌇 باللهجة الفلسطينية ، بقلمي (اعادة ( للترويح عن النفس )
🌇جان زهر 🌇 باللهجة الفلسطينية ، بقلمي (اعادة ( للترويح عن النفس )
*******************
__له ، له ، له يا ابو العبد راكب حمار ؟! هاي آخرتك يا جاري ؟ فين سيارتك ، عسى تكون بخير وما تكون خابط السيارة ؟....
__بالأول صباح الخير يا خيا ابو سليم ، انا بخير الحمد لله ، كل القصة يا جاري أني بعت السيارة وحلفت يمين عالسيارات ووجع الراس اللي بيجينا من ورآها ، فوق المصاريف اللي الها اول وما الها آخر من تصاليح كل يوم والثاني عالكراج غير الطواير والبناشر والبنزين والتأمينات و،و ، الخ، الخ ، واللي غطّى ووطّى المخالفات اللي هي أشكال وألوان والشرطة اللي بتلاقيهم زي القرود متخبّين بشي قرنة بهالشارع فجأة بيطلعلك زي لقريني ، بتجفل باربعتك وبتقول يا فتاح يا عليم يا رزاق يا كريم ،.....
__هاي مبيّن لي واصله حدها معك يا ابو العبد ، لهالدرجة اللي عندهم سيارات بيتغلبوا ، الحمد لله اللي ما عندي سيارة ومرتاح من هالمشاكل وخصوصا المخالفات ومشاكلها مع الشرطة ،.....
__ آه والله يا ابو سليم ، تطلع وراي عالحمار حتى احكيلك شو صار معي مع الشرطة الجمعة اللي فاتت ؟ انا رايح عالسوق اشتري أكم غرض لإم العبد ، شو رأيك ؟....
__لأ خيا ابو العبد انا بحب امشي ، راح امشي جنبك انت أحكيلي شو صار معك مع الشرطة ،......
__ اللي بريْحك خيا ابو سليم ، حا ، حا ، شيييييل يا بو صابر شييييل ، اللي صار يا خيا ابو سليم ، انا سايق هالسيارة وسارح بهالدنيا واللي عّم بيصير فيها والا الشرطي بنُطِلّلي زي القرد بنص الشارع وبعطيني إشارة أوقف عجنب الشارع ، قلت ببالي يا فتاح يا عليم هالقرد شو بدو ؟ خير يا اخ ؟ ..... هات رخصة بتاأك .... اتفضل هاي الرخصة بس شو عملت ؟ ..... انت مش آرف انك كنت بسوق مثل طيارة ؟ ...... لا والله يا اخ انا كنت سايق بحدود السرعة ،.... انت بِكَذِّب انا ولك كلب أربي ؟....... انا ما كذبت قلتللو يا ابو سليم بنرفزة ، انا عربي وبفتخر أني عربي ومش كلب يا مقلعط انا اشرف منك ومن اللي خلفوك ،.... والله ما يحطك محلي يا ابو سليم تطلُّع فيي بنظرة غضب وهات اخلص منو ،..... انت برد أل خكومة ؟ انت بصيّخ أل خكومة ؟ انت بدك أُضرب خكومة ولَك أربي أرخابي ؟؟ ولأجل النصيب يا ابو سليم التموا العالم حوالينا يسألواشو يللي صاير !! وهو شاف العالم التمّت ، خاف ركب سيارتو شمع الخيط وفل، والا كان يمكن قتلني ورما شي سكين جنبي وقال سحب السكين علي وقتلتو للهالمخرب وكانوا مثل عادتهم صدقوه وعملو منو بطل ،...
__ له له له يا ابو العبد كل هذا صار معك ؟ الله نجاك يا جاري كنت رحت بشربة مي ، اي لكان معك حق تبيع سيارتك وتشتري هالحمار اللي سميتو ابو صابر...
__ آه والله يا ابو سليم ، هيك منو حليت مشكلت المصاريف اللي الها اول ومالها آخر والأهم مشكلتنا مع الشرطة والمخالفات والشتايم وغير تلبيسنا تهم الإرهاب وسب الخكومة ! خا.خا يا خمار يا ابو سابر الله يساإدنا ألى هيك خكومة أُنسرية خا خا شييييييييل !!!؟؟؟؟
🌇جان زهر🌇 ١٣/ ١/ ٢.١٦
الشرطي يهودي ويتكلم مقطش ال ح =خ ال ع = أ وهلم جرا وووووو