ناس بتقول أنا واد مجنون
وناس بتقوللي فجومي ودون
واللي بيتعجبوا ويقولوا
بمية عفاريت أنا معجون
وناس بتقول أنا واد صعلوك
يخرب بيت إللي بيأووك
أنا واد حلو و زي الورد
بس الورد كمان له شوك
عيبي إني مبعرفش أسكت
وأهري في نفسي ياناس وأنكت
لما بشوف حاجة مش مظبوطة
زي الكبريت أحك وأشط
وأولع في إللي بيفسد فيها
وإللي عايزها عاليها واطيها
وإللي عاملي حدق ومفتح
أقوله ياواد دا انا من حواريها
إتربيت ع العيب والكخ
وضد اللي بيكذب ويجخ
واللي يهدد فينا تملي
بناب الغول أو طائر الرخ
قولوا هجومي قولوا فجومي
قولوا إني بقطع في هدومي
هو دا طبعي ومش هتغير
إلا أما تغيروا مفهومي
لما أشوفكو إتغيرتوا إنتو
وصبحتم غير بس ما كنتم
مابتشتروا ولا بتبيعوا فينا
في سوق الجمعة وسوق الكانتو