قصيده أمى ..
ـــــــــــــــــــــــــ
مشاركتى فى احتفالات عيد الأم نادى جمهوريه شبين
كل عام وكل الأمهات بخيــــــر...
ـــــــــــــــــــــــــــــــــــــــــــــ
أمى يا صبر السنين
فاهمه صمتى قبل بوحى
ما أنت شيلتينى جنين
بإيديك بس طابت جروحى
وأنت أول المعشوقين
وف السفينه كنت نوحى
رقوه منك تشفى الألم
أنت بستان الامانى
وانت مداد القلم
ويوم ما أعانى
أنت الشراع على مركبى
تحمينى من مر الضياع
أنت الوش الحقيقى
اللى باقى من غير قناع
وأنت وحدك تشترى
لما ألاقى الكل باع
ما أنت الشراع
تلملمى مذكراتى
وذكرياتى
وتنفضى من عليها سنين الخداع
وكل ما أشعر إنى كبرت
وعمرى ضاع
أجرى عليكى
وأحط راسى بين إيديكى
وأقولك ربنا يخليك ليا
تقولى لأ
قول ربنا يخلينى ليكى
#إبراهيم_معوض
#إليك_يا_أمى
