" الجار للجار ولو جار " 🌇جان زهر 🌇 ( بقلمي )
*****************
بيت ابو العبد وبيت ابو الياس جيران العمر الباب بالباب منذ ان كانوا اولادهم اطفالا حتى زوجوهم وما زالوا على قلب واحد ، كل يوم بيعملوا صباحية عند بعض على فنجان قهوة وكعكة والذي منه ، الرجال متقاعدين بيقضوا نهارهم مع بعض على نفس ارجيلة او لعبة طاولة والنسوان بيقوموا بشغل البيت واولادهم مجوّزين وكل واحد ببيتو ، هذا النهار كان غير شكل !!!!!!!!؟؟
__ صباح الخير خيا ابو العبد ، حاضرة قهوتكو ؟ اليوم الصباحية عندكم انا ومعي ام الياس ، وين ام العبد مش طالع صوتها ؟ فينك يا ام العبد ؟ مش شامين بعد ريحة قهوتك !!!! لا حس ولا نس ؟؟؟...
___ ام العبد مش هون ! رد ابو العبد وروحو بطرف مناخيرو !! تفضلوا اقعدوا يا جيراننا الطيبين لحد ما احضر القهوة هالمرة بتشربوها من ايدي ، ام العبد طفشت وراحت زعلانة عند امها !!!؟؟؟...
__ يا فتاح يا عليم ، خير ان شالله سألت ام الياس ؟ ام العبد ولا مرة عملتها ؟؟؟ له ، له ، له ، هاي مش خبرية يا ابو العبد ، شو السبب اللي خلّا ام العبد تطفش ؟؟ سأل ابو الياس : لتكون زعّلتْها يا ابو العبد !!!؟....
___لا سبب ولا دياولو ، القصة ومافيها اني ما حبيت طبيخها اليوم وقلتلها شو هالخبابيص اللي طبختيلنا اياها اليوم ؟! ويا حرة مع مين عْلقتي يا خيا ابو الياس !! والك رب والي رب انا رايحة عند امي ومش قاعدتلك في البيت ولا دقيقة ، بكفيش كل النهاربالمطبخ واقفة عَ إجراي طبيخ وغسيل وانشري ولمّي الغسيل واطوي وإكوي ، يا ام العبد ، وبعد كل هذا بتقوللي طبيخك خبابيص ، ياللي ما بتخاف من ربك ، ولملمت اواعيهاحطتهن في البقجة ودوز دغري عند امها العجوز الطيبة ، والله واعلم شو في براسها بعد بدها تعمل يا خيتا ام الياس ؟!؟!...
___لا والله يا جارنا ابو العبد ، ردت ام الياس ، روحنا معلّقة ببعض انا وياها ، وما منقدر نستغني عن بعض ، قوموا كلنا سوا نروح ونرضي خاطرها ونرجعها عالبيت اليوم قبل بكرا .........
___والله عسلامتكً خيتا ام الياس ، انت قدها وقدود ، واحنا على رأيك ومش مفشلينك ، يالله يا ام العبد جاينلك فازعين دارعين راح نشرب القهوة الصباحية عند والدتك الطيبة ، وسّعي باب بيتك يا ختيارة يا غالية .....
____ يا هلا بالناس الطيبة ، رحبت الختيارة في ضيوفها اللي هم اولادها وغلت القهوة وجابتها ، ولكن ، ام العبد مش طالّة ؟! فين ام العبد يمّا يا طيبة ؟؟ سأل ابو العبد وام الياس ؟؟!!
___ ام العبد مِحِرْنة ردت الختيارة !! فوت يا ابني يا ابو العبد راضيها وشوف شو بدها ، مالكوش بالعادة تزعلوا من بعض ، اكسروا الشر وتعالو نشرب القهوة مع بعض كلنا سوا قبل ما تبرد !! .....
___ام العبد طلّت وهجمت على حبيبتها ام الياس وهات يا عبط وبوس ، والله اشتقتلك اليوم يا خيتا ام الياس ، جيْتك غالي علي ، بس مش راجعة مع ابو العبد الا بشرط انو يوكل شو بطبخ بدون تعليق !!...
___انا راح احل المشكلة رد ابو الياس ، ام العبد شاطرة بالمقالي والتتبيلات والسمك والمشاوي والباذنجان المقلي وجنبه الحلزون اطيب اكل ، وام الياس شاطرة بطبخ اليَخاني على انواعها ( جميع انواع الخضار بازيلا بامي وغيرها وغيرها هاي هي اليخاني ) وجنبها الرز المفلفل ، وجميع انواع المحاشي ، والحل راح يكون مشترك ، وعِشْرة حلبية ، بنزل انا وابو العبد عالسوق ، منشتري لوازم الطبخة اللي حابين توكلوها هداك النهار والدفع بكون مناصفة ،منوصلكم الغراض عالبيت ، وام الياس مع ام العبد بحضروا الأكل مع بعض كل يوم في بيت واحنا منلعب دق طاولة انا وابو العبد لعند ما يحضر الأكل على الطاولة منقعد سوا ومنلدع الأكلات مع بعض لامين شاف ولا مين دري ، وكل يوم على هالرشّة ، شو رايكم ؟!
___ والله يا ابو الياس جبتها على صينية من ذهب ، بارك الله فيك ، كلنا موافقين ، شو رايكم يا ام الياس وام العبد ؟؟؟؟!!!!
___ والله موافقين ، لولولولوليش انحلّت العقدة ولولولوليش ومنشرب قهوتك يا ختيارة السعد ، فين زغرودتك يا طيبة ؟!؟!
___ وكانت زغرودتها طويييييييييلة هالختيارة الطيبة . 🌇جان زهر 🌇
