قصيده بعنوان....... إختار يموت
جنب بيتنا كنت أشوف
شاب لابس بدله زيتى
فوق كتافه نجمتين
كل شهر كان بيجى
ف البلد يبات يومين
شاب كان طيب صبور
شاب فى عمر الزهور
طلته زى النسور
كان يودع أهل بيته
بكلمه حلوه وبسمتين
..................
كانت تقوله ولدته
يحميك يا أبنى ربنا
تحمى شرفنا وأرضنا
تعيش سنين وسطنا
والظلم بكره ف يوم يغور
خليك بطل عزمك حديد
خليك يا أبنى ع الوعيد
وإوعاك لاتنسى حق أخوك
اللى كان قبلك شهيد
..................
وألقاه بيبكى م الكلام
ويقول يا أمى خلاص تمام
والهمه تجرى فيه قوام
يسحب ف إيده شنطته
يمسح همومه ودمعته
ماشى وراسم سكته
أول مايوصل وحدته
يحط إيده ع الزناد
كان الولد يحمى البلد
ضهره حديد زى الأسد
الفرحه فيه عامله حداد
...................
وفجأه ناس عدوا الحدود
ويا السلاح شايلين بارود
الشر طالع من عنيهم
بالرصاص إنهال عليهم
وف لحظه كانت من صمود
صان البلد حفظ العهود
وزى أخوه علشان نعيش
أختار يموت
كلمات الشاعر محمد ثروت عبد الحفيظ