الربيع
------
ونسمة حلوة بتتمختر
فوق البساط أخضر ف اخضر
شافت زهور مالية البستان
ألوانها زاهية ابيض واحمر
حتي البنفسج بلا أحزان
والغيرة هربت م الأصفر
تناجي بعض علي الأغصان
تميل بحب وحنية
تبعت عبير نرجس وريحان
يعطر الهوا والميه
وطير بيشدي بالألحان
طرب وكله ملاغية
والجو كله أمل وأمان
والناس سعيدة وفرحانة
والشمس طالعة ترش حنان
وعيونها هايمة ونعسانة
والدنيا مليانة بخلان
قلوبها صافية ونشوانة
تحت الخمايل كل اتنين
بيحلموا بأحلي سعادة
بين الجمال تاهوا في الكون
والحب م القلب عبادة
أصل الربيع ده فصل حنون
عسل وسكر وزيادة
حتي الطيور حتي الأشجار
عاشقة وليلها سهرانة
من كل صنف وشكل ولون
نشوان وفرحان ويانا
والكل يشكر رب الكون
أنعم علينا وهنانا
وبعد برد شديد وفظيع
جانا الربيع قام دفانا
ياريت نلاقي الجو بديع
طول السنة يبقي معانا
فصل الربيع دا جميل ووديع
والفضل كله لمولانا