صرخة
لما الجدار انهدم
ضاع في الفضا بابي
عشت في ذل و ألم
مع حيرتي و عذابي
و لوحدتي .. و العدم
و ف بعد أحبابي
و ايه بايدي أنا
غير حجرة بارميها
ترجع ف وشي أنا
ما أقدرش أفاديها
رصاصة طايشة بتصيبنى
تصيب بنتي تصيب ابنى
وتلهب نار تعذبنى
و أعمل ايه و انا وحدي
و تاه أملي..و ضاع مجدي
و رحتوا فين يا اخواني
دنا بيكم أكون قوة
و آخد حقي بالقوة
و أرمي عدوى في هوه
و يرجع تاني يطربنى
من المسجد أذان ربي
يهز ف قلبي من جوه
و أصلي ف أمان و سلام
يرفرف في سمايا حمام
و اغمّض عيني لما أنام
بدون ارهاب بدون آلام
د انا بافطر رغيف الخوف
و باتغدي بعار و كسوف
و قلبي عالعيال ملهوف..
و ايه فايدة يا عالم دار
بدون بوابة و لا جدار
و موجودة ف قلب النار
و مش قادر أرد الأرض
و مش عارف أصون العرض
و ايه فايدة وجودي يا ناس
و أنا في قبضة الخناس
عدو غادر .. و ناس ملاعين..
و باصرخ أنادي يا فلسطين..
يا أرض الأنبيا و الدين..
و عارف إن فيه ملايين
مثالك.. يا صلاح الدين..
لكن نايمين .. ومش سائلين
و قالوا خلاص حييجي سلام
سلام.. دا لمين؟؟
و جاي.. من مين؟؟
دا كله كلام .. و دي أوهام..
نعوم بيها.. مع العايمين..
و نتشحطط شمال و يمين
ح نستنى صلاح الدين
ح يصحى من سباته سنين
يقيم الحد ع الظالمين
و نزرع في الروابي زتون
و نزرع كرم ..و كمان و تين..
و نبني برج عالي متين..
و نملاه قمري بالملايين..
و شي زاجل .. و شي هزاز..
و اخواني اللي ساندوني
ح يبقوا ف قلبي برضه عزاز..
