لا تقطفي. .بقلم الشاعر. .صبحي ياسين

.
بقلم الكاتب / عبدالمجيد الديّهي ؛
....................................
.
طير وافرد جناحاتك ياحمام ؛
...................................
.
.
أنا سكنت وهربت من نفسي
جوَّه حروف الكلام
وبدرت بذور هنا وسعد
في بساتين جناين النوام
دي حياتنا صارت منابت شوك
بـ تجرح الأحلام
ومكتوب علينا نـ عيش فيها
خطاوي ذنوب وآثام
غرامات
وفلوس مدفوعة للبطاقات
وحياتنا بقت أورام
في كل خطوة نخطيها
الجيوب متفتحة بـ إرغام
البنت هـ تتجوز
لابد من سلسلة إجراءات أقلام
والإبن لازم يدفع
كام ملطوش موش فاكر بالتمام
ومشاوير عذاب
رايح جاي للإعتماد والإستلام
وصورة للعريس بالطول
والعرض وكمان معاه المدام
وكشف طبي
عشان
الذرية الصالحة والإصطدام
عايشين سنين مرار
مابين المصالح وحبر الأختام
وصدى الصوت
في إدارات المرور قرار أحكام
والدفع مع الكوبون
بلا إعتراض والقرار إلزام
واتفتحت منافذ الشبابيك
وموش فاكر بالضبط عددها كام
تجديد تصريح الرخصة
زاد سعره ثلاثين جرام
وزادت غرامات القطارات
وقيمة الإشتراك أكوام
وتذكرة مترو الغلابة
سعرها زاد وزاد الإختصام
والوزير حلف يمين طلاق
لارجوع ولاعودة
والقرار رهان إعدام
وكمان
مصروفات المدارس زادت
والبركة فـ الإعلام
والمرتب واقف مكانه
موش عايز يحرك الأقدام
الصبر ياأهل الدار
غناوي القهاوي بقت إرغام
والمستخبي ظهر وبان
وأسرار السعادة فـ البرام
مولود ييجي للدنيا
هـ تدفع ولو كان من الأيتام
والميت مات
هـ تدفع ثمن خروج روحه
أوام أوام
وهـ تعد كام سنة عاشها
في دنيا الحزن والآلام
وتعريفة النعش متحددة
بـ الخطاوي على التمام
ودخول
القبر ونوم الهنا والسعد
رضا من الصوام
وعناقيد الحزن
مكتوبة ع الجبين وجناح الحمام
والظاهر كده والله أعلم
فيه غرامات ع الأحلام
والخوف تُفْرَضْ غرامات
ع الضحك والإبتسام
ماهو كله جايز وكله ممكن
في ظل الحب والوئام
آه يازمن الأوجاع
قسوة دنيا الحياة جابتلنا أورام
ولاعاد فيه رحمة
ورغيف العيش الحاف
صار إنعام
عمرك عشت فـ اللف
والدوران للخلف والأمام
أنا شفت أيام سودة مع السادة
الموظفين في شباك الزحام
ملاوعة وملاغية
وكلمات متنقّية على التمام
وبـ صراحة أنا موش عارف
سر أسرار الإنسجام
تلميذ بليد فـ الرقص ع الحبال
وأخاف م الحرام
ودايما رافع شعار
هلال الحلال واحترام النظام
لكن نعمل إيه يا إما الدفع
ياوقف الحال ع الدوام
وعُرْف الدفع إنتشر
والمحسوبية صارت إغتنام
والناس عمالة
تلزقها فـِ الرئيس وتقول كلام
هوَّه الرئيس قاعد فـِـ الشباك
مع موظف الأرقام
احنا إلليِّ سكتنا عن السلوكيات
وقبلنا الإنضمام
ومفاهيم المفهومية
وأصل الرجولة صارت إتهام
تعرف تغني وتقول معايا
طير وافرد جناحاتك لـ فوق ياحمام
.
................................................
.
بقلم الكاتب / عبدالمجيد الديّهي
من ديوان ( العزف على وتر
الأنغام " الجزء الثاني " تحت الطبع )
...............................................
.