جابوا الفـطار للعجل
والرجل فوق الرجل
رمــي بجهله الفـجل
وعينيه علـــي اللــيه
علــي نـارنا مشــوية
واللحــم ما هــو ليا
وبعـد أكـله جــل
خلي ريقنا إتشل
بطنه ما ليها حل
وفي صيامنا مؤذيه
شوفتوش كده فجعة
في دنيا مش راجعه
لناس ومش جدعة
ولا إحنا فقرية
بنقول حلال وحرام
جنب الحيطان بنام
نتمني في الأحلام
نفطر بطعمية
مع عودين جرجير
وهو كله فضلة خير
علي قاعدة ويا حصير
ما تجبش تعنية
من اللي ما يشبع خير
جوه الطمع بيطير
لو جاله يوم أمشير
يلعن أبوه فيا
أصل الجشع غية
ما يرق بحنية
وعينه معميه
عن كل فعل الخير
دول ناس ومتزوقه
في مراية مش شايفه
إيديها متحروقه
بالنار ما هي خايفه
وشوشها متلونه
وألوانها لها كارفه
وهي متبغدده
علي أيه ما هي عارفه
يا كل نفس دنيئة
الضيقة علي الأبواب
ظلمتم نفوس بريئة
والظالم بظلمه خاب
أفتح ايديك للسما
في الحضن ضم أحباب
تلقاك في يوم الهنا
لو حتي جيبك شاب
-------------
أصل الجشع غية ..!
الشاعر محمد ضباشه