لا تقطفي. .بقلم الشاعر. .صبحي ياسين

وادى النمل
▪▪▪▪▪▪
مفتتح
لافف حزام نأسف
ع القلب الى كان ملهوف
دا نبضه كان عاصف
دلوقتى مات م الخوف..
ءءءءءءءءءءءءءءءء
اللى مزروع جوا منى قلب
ولا حته بلاط
سكت م النبض أصله
واخد ع السكات
شراينه لفت بعضها
بموجه إتعودت طعم الآهات
دقه جنونه إتحولت
نغمه ثبات
سمع الغفير بيصرخ ف وش الفقير
أوعاك تدور ع اللى فات ..
بحبك .. بحبك ..
يا قاتل الروح البريئه جوا نسيم الكون
لجل ما يهتف كل يوم بإسمك
حبك وسام على صدر
صورتى الميته م الخوف
جوا جلد إختفى
والعضم بات مكشوف ..
حبك يزين من عمدان الضلوع
أحلى شاهد قبر
ع القلب اللى مات م الجوع
وعوضى عليك يا صبر
طالعه بواقى النمل م الشقوق
هيمانه ف حبك ..
بعد ما حطمت وبكل ذوق
اللى مدخلش المساكن ..
سليمان يا أيها البطل الهمام
إفرد عساكرك ع الحيطان
تحرك الخوف اللى ساكن ..
يطلع كبيرهم جاهل بالكتاب
وبرضه يجيب العرش ...
بلقيس على طول تكشف صدر فستانها
وهى عارفه ان الصرح
من صنع هذا الجان ...
تيجى اللجان هنا
وتحط إسمك في الكتاب
سليمان يحسدك
ويعزى نفسه بالعتاب
لما يشوف حبنا
منقوش فوق قوايم جسمنا
بدم طالع من ضهر مجلود
شايل فوق نسيجه
صوره شهيده ع الحدود
فيشهد على هذا الحب العظيم
بعيون مليانه بكا
يمسح بواقى البسمه
اللى كانت ف وش النمل
ويزيح على نفسه التراب
فيخف عنه الحمل ..
ويغيب ويا آخر نفس ...
كان سامعه بيهتف للحرس ...
بحبك .. بحبك ..
يا قاتل الروح البريئه جوا نسيم الكون ..
لجل ما يهتف كل يوم بإسمك
بحبك .... بحبك ... بحبك
=======
إبراهيم معوض