ليالينا الحلوة
--------------
ياجَيْ وناوي علي رحيلك ..من قبل ماجيت
نوّرت الدنيا بقناديلك .. عمّرت البيت
دي قلوبنا للقاك اشتاقت .. من يوم مامشيت
نشتاق ومانقدرش نجيلك .. نلاقيك هليت
بتخضر أيامنا الجافة .. وتبل الريق
توعدنا تحقق أحلامنا ..والحلم بريء
والدنيا علي عهدك شاهدة..والنصر مضيء
وح ندخل بهداك الجنة .. من أحلي طريق
وتعدي ليالينا الحلوة ..ف عبادة الله
وقلوبنا للخير متسابقة .. وعشمنا رضاه
والخاسر اللي بيحسبها..سهرة وملهاه
ماينوبه غير عطشه وجوعه ..وغضب مولاه
ربنا حيبارك أموالك .. لو تدّي فقير
ماهو زوّد فيها علشانه ..له حق صَغِير
لو ياخد حقه لا حيشكي .زولا يوم ح يغير
ويبارك ربك ف حياتك .. والمولي قدير
إيه يعني ح تجوع أو تعطش ..ماهو فيه ملايين
العمر بحاله عطشانة .....وكتير جعانين
خلينا نحس بأحوالهم ..ونراعي الدين
دي الصدقة بعشرة أمثالها ..ويمكن سبعين
ودي فرصة كبيرة للعاصي وياريته يتوب
ويطهّر قلبه بإيمانه.. وح يمحي ذنوب
والمولي حيغفر له ويهدي ..ودا رب قلوب
بالتقوي ح تسعَد أيامه ..ويبات محبوب
رمضان أيامه يامحلاها .. ماهو شهر سعيد
وياريته يستني معانا....والبركة تزيد
والصحة بترتاح ف صيامه..وبتبقي حديد
وبيرحل وبيبعت لينا .. أفراح العيد
أم الشعراء