السلام عليكم ورحمة الله
يسعدني تواجدي معكم الليلة ببعض الكلمات البسيطة أتمنى لكم وقت طيب وصوم مقبول
.........
مسحراتي
مسحراتي أقوم ليلاتي
أشوف أولادي الشقيانين
أدق بابهم علشان سحورهم
ما ألاقي غير جبنه أو بليل
أقول يا عيني على الغلابة المطحونين
أدق دقه
على دي الطبلة
يفوق عليها حتى الوزير
لكن دا فوقته
مش من نومته
من سهراتة وملذاتة
لينسى بها كل فقير
يرفع صوته
ويبعت كلابه ليرموا بيه وسط الطريق
ألم حالي وأسرح ببالي
وقول يا عمر العدل فين
أرجع مكاني ما بين الناس الطيبين
أدق دقة
علي دي الطبلة
يفوق عليها عم أمين
صاحب دكانه جوي شارعنا
يبيع فيها بمكسب قليل
ما بين جيرانه معروف بإنه راجل رحيم
لا عمره خان
ولا عمره غش زبون ضعيف
بيمد إيدة دايما يساعد كل فقير
مع إن حالته على قد عيلته
لكن بنزاهته كبر في عيونا
وأصبح وزير الغلبانين
أدق دقه
علي دي الطبلة
يمشي ورايا أولاد كتير
من كل شارع وكل حارة
مهللين يا عم يللي
بتجيب الفرحة بآخر الليل
قول لرمضان يبعت بغيثه علي الغلبانين
طول الشهور مستنينة ما نمد الإيد
زكاة وصدقة من غير سؤال
هتدق بابنا في أي حين
مسحراتي بقوم ليلاتي
أشوف ولادي الشقيانين
قبل الأذان قسمت زادي
مع زاد عم أمين
رفع الأذان وحمدنا رب العالمين
علي نفوسنا الطيبة
وبيقولوا عنا غلبانين
إحنا أغنا من الوزير
#سناءأبوطبل
