قصيدة بعنوان.......... مسحراتى
مسحراتى عمال أهاتى
إصحوا يا نايمين
القدس راحت
وسوريا ناحت
ولا ٱنتوا مش شايفين
ف بيتكوا خمرة
وسنينكوا غبرة
والأرض طاهرة
يا خلق ياتايهين
رضيتوا لينا بالظلم ليه
يا أخونا يا صايمين
ده شهر رحمة
مش أكل لحمة
وغيركوا مش لاقيين
يا ابو عمة بيضا
ما بقتش بيضا
بقى لونها زى الطين
أطفال بتبكى
ونساء بتشكى
من قسوة الناسيين
ياخلق قوموا
ع الحق ثوروا
ع القدس بالملايين
الأقصى نادى
وإحنا ف تباتا
بقلوبنا مش سامعين
ع الحق يلا
كفيانا ضلمة
عايشين ومش عايشين
بالهمه نقدر
نوصل ونغلب
ونحرر الباقيين
مسحراتى قلبى بيبكى
على عيون غافلين
باعوا القضية
فرحوا شوية
على جثة التانيين
هى العروبة
صابتها نوبة
والا السبب من مين
الشهر جانا
نور حدانا
با الخير ملانا
وإزاى نكون جاحدين
إدعوا معانا
تطرح سمانا
أبطال تصون وتعين
بالوحدة نقدر نوفى ونحمى
أبرياء عايشين
الكل يدعى
يسجد وينوى
نية التايبين
إيدى فى إيدك
دمى ف وريدك
بالجد نبنى
قوه تدوم ل سنين
كلمات الشاعر محمد ثروت عبد الحفيظ