لا تقطفي. .بقلم الشاعر. .صبحي ياسين

( امشي تحت الحيط وطاطى )
**********************
كنـت ماشي فى طريقي
والطــــــريق أصلا طــــويل
فجــأة قبــل ما بل ريقي
شفـــــت شخص فقير ذليـل
كــان بياكل خبز ناشف
كسرة واحدة مافيش غاريها
الكلاب هجمت عليها
الفقير أصبح ... قتيل
رحت حاضنه وقلت يا ابنى
مين هيعتب ع الكلاب
يا ابنى سيبك من سيادنا
هما دول سبب الخراب
كل شعب مصر عايش
من عملهم فى العذاب
المياه ماعدتش تنفع
فيها حاجة للشراب
حتى سوريا أو يمنا
قل لى هل فيهم شباب
شعب بورما أو عراقنا
حتى قدسك ف اغتصاب
العتاولة يا صديقي
خلوا راسنا ف التراب
إحنا ننحت فى المذلة
وهما ياكلوا فى الكباب
إيه ناقص بس قل لي
غير نموت وسط الخراب
قال يا عمى ...أرجوك سامحني
أنت من نسلٍ أصيل
إياك تدافع عن شرفنا
يصنفوك … إنك عميل
امشي تحت الحيط وطاطى
يعينوك أنت البديل
ويوم ما تمسح فى جزمهم
مش هيبقى … ليك مثيل
بس يوم ما تقول مبادئ
تبقى ناوي ع الرحيل
روح يا عم ... وعيش حياتك
إنشاالله حتى تعيش بخيل
المبادئ في زمنا
ضمن باب المستحيل
قلت يابنى ... أيه جرالك
كيف أعيش وسط اللئام
إحنا ناس .... أخلاقنا عالية
مش بنمشي فى الظلام
من زمان حطيت شعاري
ورحت وازنه بالجرام
لو حأموت ...ميت ألف ميتة
بردوا ما دوق الحرام
بكرة تركب فوق ضهورهم
بس شد أنت .... اللجام
********************
شعر / حمودة سعيد محمود
الشهير بحمودة المطيرى